АҚШ “душман давлатлар” фуқароларини ишдан бўшатa бошлади
15 октябргача янги ишчилар ёллаш тақиқлангани сабабли бўш ўринлар тўлдирилмайди.
АҚШ Қишлоқ хўжалиги вазирлиги Россия, Хитой, Эрон ва Шимолий Корея фуқаролари бўлган 70 га яқин хорижлик шартнома ишчиларини ишдан бўшатди. Бу ҳақда Fox News телеканалига таянилиб Oxu.Az хабар берди.
Маълумотларга кўра, ишдан бўшатилганларнинг аксарияти Қишлоқ хўжалиги тадқиқотлари хизмати (ARS)да фаолият юритаётган хитойлик постдокторантлар бўлган. Расмийлар бу қарорни АҚШнинг миллий хавфсизлигини таъминлаш мақсадида қабул қилганини билдирган.
АҚШ Қишлоқ хўжалиги вазирлигининг баёнотида айтилишича, бу чора “душман давлатлар” фуқароларини давлат назорати остидаги тадқиқот фаолиятидан чеклашга қаратилган кенг стратегиянинг бир қисми ҳисобланади. Натижада уларнинг иш рухсатномалари, кириш ҳуқуқлари ва фаолият доиралари дарҳол бекор қилинган.
Телеканал манбаларига кўра, бу ҳаракат тадқиқот лойиҳаларига бевосита таъсир кўрсатган. Жумладан, гўшт токсинларига қарши вакцина устида олиб борилаётган муҳим ишлар вақтинча тўхтатилган.
Шунингдек, 15-октябргача давом этадиган федерал даражадаги янги ишга қабул қилиш мораторийи сабабли бўшаган ўринларга янги мутахассислар жалб этилмаслиги маълум қилинган.
