Германияда электр энергияси танқислиги юзага келиши мумкин
Саноат вакиллари ва Иқтисодиёт вазирлиги муқобил энергия стратегиясининг самарадорлигига шубҳа билан қарамоқда.
Германия Федератив Республикаси яқин йилларда электр энергияси таъминотида муаммоларга дуч келиши мумкин. Бу ҳақда мамлакатдаги етакчи нашрлардан бири — Bild газетаси хабар бермоқда.
Нашрнинг ёзишича, Германия Иқтисодиёт ва иқлимни муҳофаза қилиш вазирлиги ҳамда саноат вакиллари муқобил энергия манбаларига асосланган ривожланиш стратегиясининг реал имкониятлари борасида жиддий хавотир билдираётгани айтилмоқда. Жумладан, шамол ва қуёш электр станцияларининг жорий ва режалаштирилаётган ҳажми мамлакатнинг ортиб бораётган энергия эҳтиёжларини тўлиқ қоплай олмаслиги қайд этилган.
2024-йилда Германияда саноат корхоналари ва аҳоли томонидан жами 464 тераватт-соат электр энергияси истеъмол қилинган. Прогнозларга кўра, 2035-йилга келиб бу кўрсаткич 1000 тераватт-соатгача етиши мумкин. Шу билан бирга, Германия энг кеч 2038-йилгача кўмир ёқилғисига асосланган электр станцияларини босқичма-босқич тўлиқ ёпишни режалаштирмоқда.
Энергия ишлаб чиқаришдаги бу кескин ўзгаришлар фонида муқобил манбалар — қуёш ва шамол электр станцияларининг тезкор ривожи таъминланмаса, электр тақчиллиги юзага келиши мумкин. Мутахассислар бундай ҳолат мамлакат саноатига ва иқтисодий барқарорликка жиддий таъсир кўрсатишини таъкидламоқда.
Шунингдек, энергия заҳираларини кафолатлайдиган заҳира қувватлар ва сақлаш инфратузилмаси ҳам ҳозирча етарли даражада шаклланмаган. Бу эса энергетика хавфсизлигини таъминлашда қўшимча муаммоларни юзага келтиради.
