Тайванда "вампир мураббий" талаба қизларни қон топширишга мажбурлагани фош бўлди
Университет мураббийси талабаларни кредит бермаслик билан қўрқитган.
Тайванда аёллар футбол мураббийаси талабаларни ўқиш кредити эвазига қон топширишга мажбурлагани бўйича жанжал юзага келди. Бу ҳақда South China Morning Post ва Mentoday.ru нашрлари хабар берди.
Тайван Миллий Нормал университетида ишловчи 61 ёшли мураббий Чжоу Таййинг талаба қизларга босим ўтказиб, уларни кўп миқдорда қон топширишга ундаган. Ушбу ҳолат талабалар томонидан ошкор қилингач, у “вампир мураббий” лақабини олди.
Айбловларга кўра, спорт кредити олиш учун талабалар ҳатто 14 кун кетма-кет, баъзида кунига бир неча маротаба қон топширишга мажбур бўлган. Талабалардан бири, Цзян исмли қизнинг сўзларига кўра, у ўқиш давомида 200 га яқин пробирка қон берган. "Саккизинчи кун кетма-кет қон топшираётганимда, қўлларимдаги томирларни топиш қийин бўлиб қолган эди", — дея изоҳ берди у.
Қон топшириш жараёнлари университет ҳудудида, “илмий эксперимент” сифатида ўтказилган. Бироқ қонни ким олгани ва бу шахслар малакали тиббиёт мутахассислари бўлган-бўлмаганлиги номаълумлигича қолмоқда. Айрим талабаларнинг айтишича, мунтазам қон топшириш оқибатида соғлиги ёмонлашган ва улар касаллик таътилига чиқишга мажбур бўлган. Шунга қарамай, аксарият ўқувчилар бу ҳақда ота-оналарига айтишга журъат этмаган.
Мазкур можаро жамоатчилик эътиборига тушгач, 13-июль куни университет расмий баёнот бериб, Чжоу Таййингни барча мураббийлик ва маъмурий лавозимлардан четлаштирган. Эндиликда унга ҳар қандай спорт жамоасини бошқариш тақиқланган.
Мураббийнинг бу ҳаракатлар орқали қандай манфаат кўргани ҳозирча аниқланмаган. Расмий донорлик қонун-қоидаларига кўра, қон топшириш учун махсус марказларга мурожаат қилиш, зарур ҳужжатларни расмийлаштириш талаб этилади. Бундай шароитда, кампусда, номаълум шахслар томонидан олиб борилган қон тўплаш ишлари қонуний эмаслиги, ҳатто хавфли экани таъкидланмоқда.
Мазкур воқеа Тайванда кенг норозилик уйғотди ва тергов ҳаракатлари давом этмоқда.
