Хитойдаги боғчада болалар қўрғошиндан заҳарланди
Хусусий боғчадаги заҳарланган 247 нафар бола касалхонага ётқизилган.
Хитойнинг Шенси провинциясида жойлашган хусусий боғчада 247 нафар бола қўрғошин билан заҳарланиб, касалхонага ётқизилди. Бу ҳақда "Синхуа" агентлиги хабар берди. Ҳолат юзасидан маҳаллий расмийлар тергов ишларини бошлади.
Боғча раҳбари ошпазларга таомни жозибалироқ кўрсатиш мақсадида унга бўёқ қўшишни буюрган. Аммо қўлланган бўёқ турлари “истеъмол учун яроқсиз” бўлиб чиққан. Бу зарарли тамлар 2024 йилнинг май ойидан бери мунтазам ишлатилган.
Заҳарланган болалардан 234 нафари биринчи даволаш босқичини якунлаб, касалхонадан чиқарилди. Қолганлари ҳам шифокорлар назоратида даволанишни давом эттирмоқда. Болаларда қўрғошин даражаси нормадан юқори бўлгани аниқланган.
Ҳозирда иш юзасидан олтита шахс, жумладан боғча инвестори, директори ва ошпазлари ҳибсга олинган. Тергов ишлари давом этмоқда. Маҳаллий ҳокимият бундай ҳолатларнинг олдини олиш учун назоратни кучайтиришини билдирди.
