Деҳли аэропортида ўзбекистонлик аёл ҳибсга олинди
60 ёшли Ўзбекистон фуқароси бошқа йўловчининг учта сумкасини ўғирлашда айбланмоқда.
Ҳиндистон пойтахти Деҳлидаги Индира Ганди халқаро аэропортида 60 ёшли Ўзбекистон фуқароси бошқа йўловчининг багажини ўғирлашда гумонланиб ҳибсга олинди. Бу ҳақда маҳаллий полиция вакиллари маълумот берди.
Расмий маълумотларга кўра, 15-июн куни Куала-Лумпурдан учиб келган йўловчи аэропортнинг 3-терминалида ўзининг учта қўл юкини йўқотганини билдирган. Ўтказилган видеокузатув таҳлили натижасида, бир аёлнинг юк камаридан сумкаларни олиб, такси орқали аэропортни тарк этгани аниқланган.
Тергов давомида гумонланувчининг шахси аниқланиб, у Деҳлига қайтганида аэропортда қўлга олинган. Айбланувчи Ҳиндистонга тижорат мақсадида келгани, багаж конвейерида ўз юкини кутганида бегона сумкаларни олганини тан олган.
Ўғирланган сумкалар Деҳлининг Пахарганж туманида жойлашган меҳмонхонадаги хонанинг ичида топилиб, эгасига қайтарилган. Ҳолат юзасидан тергов давом этмоқда.
