Ҳиндистон талабаларини Ўзбекистондаги тиббиёт университетларида ўқимасликка чақирмоқда

Ҳиндистон Миллий тиббий комиссияси (NMC) хорижда тиббиёт бўйича таҳсил олаётган ёки ўқишни режалаштираётган абитуриентларга мурожаат қилиб, Марказий Америкадаги учта ва Ўзбекистондаги битта тиббиёт олийгоҳига ўқишни тавсия этмаслигини маълум қилди.

 

NMC баёнотида таъкидланишича, мазкур таълим муассасалари Ҳиндистоннинг тиббий таълим стандартларига жавоб бермайди. Хусусан, Тошкент давлат тиббиёт университетининг Чирчиқ филиалида таҳсил олишдан огоҳлантирилди. Қолганлари эса Белиздаги Марказий Америка соғлиқни сақлаш ва фанлар университети, Колумбия Марказий университети ҳамда Вашингтон соғлиқни сақлаш ва фанлар университети бўлди.

 

Комиссия мазкур университетларда керакли академик ва клиник стандартлар мавжуд эмаслигини, зарур инфратузилма етишмаслигини, контракт тўловлари жуда юқори эканини, таълим сифати ва шароитига доир ёлғон маълумотлар тарқатилаётганини таъкидлади. Айрим талабалар ўқишни тарк этмоқчи бўлганида уларга босим ўтказилгани ҳам қайд этилган.

 

NMC хориждаги барча ҳинд талабаларини FMGL (Foreign Medical Graduate Licentiate) қоидаларига қатъий риоя қилишга чақирди. Бу қоидалар ўқиш давомийлиги, ўқув дастури, таълим тили, клиник тайёргарлик ва амалиёт каби жиҳатларни ўз ичига олади. Мазкур талаблар бажарилмаса, Ҳиндистонда тиббиёт соҳасида ишлаш учун рўйхатдан ўтиш имконсиз бўлиши мумкин.