Исроилда Нетаняхуга суиқасд уюштирган кекса аёл ҳибсга олинди

Исроил хавфсизлик хизматлари Бош вазир Биньямин Нетаняхуга суиқасд уюштиришни режалаштирганликда гумон қилинган аёлни қўлга олди. Бу ҳақда “Kan” ахборот агентлиги хабар берди.

 

Маълумотларга кўра, 70 ёшлар атрофидаги аёл Нетаняхуга нисбатан тажовузкор ҳаракатлар тайёрлаганликда айбланмоқда. У Исроил марказидаги норозилик намойишлари фаолларидан бири бўлиб, қариндошлари билан бўлган суҳбатда Бош вазирга танкка қарши граната билан ҳужум уюштириш ниятини очиқ баён қилган.

 

Маълум қилинишича, аёл қурол топиш учун бошқа фаоллар билан алоқа қилган, Нетаняхунинг хавфсизлик тизими ҳақида маълумот йиғишга ҳаракат қилган. Ушбу ҳаракатлардан хабар топган ҳуқуқ-тартибот идоралари уни “Шин Бет” — Исроил хавфсизлик хизмати ёрдамида ҳибсга олган.

 

Гумонланувчи Оғир ва халқаро жиноятларни тергов қилиш миллий бошқармасига топширилган ва сўроқ давомида айбини қисман тан олган. Суд унинг ёши, соғлиги ва ижтимоий ҳолатини инобатга олган ҳолда аёлни эҳтиёт чораси билан қўйиб юборишга қарор қилди. Унга нисбатан Бош вазир ва давлат муассасаларига яқинлашиш тақиқи жорий этилган.

 

Тергов тафсилотларини ёритишга оид суд томонидан илгари эълон қилинган чекловлар эса бекор қилинди.

 

Мазкур ҳолат юзасидан мухолифат етакчиси Яир Лапид баёнот бериб, воқеани кескин қоралади: “Бош вазирга суиқасд уюштириш ҳар қандай ҳолатда ҳам оғир жиноятдир. Бундай ният эгалари муқаррар жазога тортилиши керак”, — деди у.