Байден хотиралари учун 10 миллион долларлик шартнома имзолади
Китоб ҳали чоп этилмаган, аммо нархи Обамалар ва Клинтоннинг мемуарларидан анча паст.
АҚШнинг собиқ президенти Жо Байден ўз ҳаёт йўли ва сиёсий фаолияти ҳақида ёзаётган хотиралари учун йирик нашриёт билан шартнома имзолади. Wall Street Journal манбаларига кўра, Байден мемуарларини чоп этиш ва тарқатиш ҳуқуқини Hachette Book Group нашриётига 10 миллион долларлик аванс эвазига топширган.
Шартнома доирасида асар муаллифлик ҳуқуқлари бутун дунё бўйлаб Hachette компанияси тасарруфига ўтади. Байден манфаатлари эса Creative Artists агентлиги томонидан ҳимоя қилинади.
Ҳозирча китобнинг нашр санаси аниқланмаган. Нашрнинг ёзишича, президент соғлиғи қўлёзма якунланиш муддати ҳамда маркетинг стратегияларига таъсир қилиши мумкин.
Маълумотларга кўра, ушбу мемуар қиймати собиқ президент Билл Клинтоннинг китобларидан 15 миллион доллар, Барак Обама ва унинг рафиқаси Мишел Обамага оид нашрлардан эса 60 миллион доллар арзонроқ баҳоланган.
