Киевда минглаб одамлар Зеленскийга қарши намойишга чиқди
Президентнинг коррупцияга қарши органлар устидан назоратни кучайтирувчи қонуни фуқаролар ва Европа давлатларининг эътирозига сабаб бўлди.
Украинада Президент Владимир Зеленский томонидан қабул қилинган янги қонун фуқаролар норозилигига сабаб бўлди. Қонунга мувофиқ, мамлакатдаги асосий коррупцияга қарши идоралар — Миллий коррупцияга қарши бюро (NABU) ва Махсус коррупцияга қарши прокуратура (SAPO) — эндиликда президент тайинлайдиган бош прокурор назоратига ўтказилади. Бу эса уларнинг мустақиллигини йўққа чиқариши мумкин, дея огоҳлантирмоқда танқидчилар.
22 июль куни кечқурун Киевда минглаб одамлар норозилик намойишига чиқди. Шунингдек, Лвив, Днипро ва Одесса каби бошқа йирик шаҳарларда ҳам норозилик акциялари кузатилди. Намойишчилар “Қўлларингни NABUдан ол”, “Биз Эвропани танладик, автократияни эмас” каби шиорларни кўтариб чиқишди.
Зеленский бу ислоҳотларни “Россиянинг ички ишларимизга таъсирини йўқ қилиш” зарурати билан изоҳлаган. Унинг айтишича, янги тизим коррупцияга қарши курашни янада самаралироқ қилади. Бироқ, фуқаролик жамияти фаоллари ва халқаро кузатувчилар бу қарорни коррупцияга қарши курашнинг орқага кетиши сифатида баҳоламоқда.
Украинанинг Европадаги иттифоқчилари — жумладан, Германия, Франция ва Швеция — янги қонунни танқид остига олди. Уларнинг фикрича, Зеленскийнинг бу қадами Украина томонидан Европа Иттифоқига қўшилиш йўлида эришилган коррупцияга қарши ислоҳотларни хавф остига қўяди.
Европа Комиссиясининг кенгайиш бўйича комиссари Марта Кос ушбу қонунни “қайта орқага юриш” деб атади ва бу ислоҳотлар Европа Иттифоқи билан музокараларни тўхтатиб қўйиши мумкинлигини билдирди.
Жамоатчилик босими остида Зеленский икки ҳафта ичида NABU ва SAPO мустақиллигини кафолатлайдиган янги қонун лойиҳаси ишлаб чиқилишини ваъда қилди. Ҳозирча бу баёнот намойишчиларни тинчлантирмаган.
Зеленскийнинг коррупцияга қарши органлар устидан назоратни кучайтириш қарори Украинада фуқаролик жамияти ва халқаро ҳамжамият томонидан кескин танқидга учрамоқда. Бу воқеалар мамлакатнинг демократик ривожланиши, Европа Иттифоқи билан интеграцияси ва халқаро ишончини жиддий синовдан ўтказмоқда.
