Европа Иттифоқи АҚШга нисбатан 90 млрд евролик бож чораларини эълон қилишга тайёр
Музокаралар 1 августга қадар ижобий натижа бермаса, тарифлар 7 августда кучга кириши мумкин.
Европа Иттифоқи Қўшма Штатлар билан савдо масаласида келишувга эришилмаса, АҚШ экспортига 90 миллиард евродан ортиқ божхона тўловлари жорий этишни режалаштирмоқда. Бу ҳақда Oxu.az нашри Европа дипломатик доираларига таянып хабар бермоқда.
Маълум қилинишича, 7 августгача томонлар ўртасида савдо келишуви имзоланмаса, Европа Иттифоқи томонидан жавоб чораси сифатида АҚШдан олиб кириладиган айрим маҳсулотларга 30 фоизгача бўлган бож тўловлари қўлланиши кутилмоқда. Ушбу чораларга автомобиллар, авто эҳтиёт қисмлар, фуқаролик авиацияси воситалари ҳамда бошқа саноат маҳсулотлари киради.
Аввалроқ, июль ойи ўрталарида АҚШ президенти Дональд Трамп 1 августдан бошлаб Европа Иттифоқидан импорт қилинадиган деярли барча товарларга 30 фоиз, пўлат ва алюминий маҳсулотларига эса 50 фоизлик божлар жорий этилишини эълон қилган эди.
Европа Иттифоқи фавқулодда ҳолатга тайёргарлик доирасида савдо музокараларини тезлаштирган. ЕИ савдо комиссари Марош Шефчович бу борада АҚШ Савдо вазири Говард Лутник билан тўғридан-тўғри мулоқот олиб бормоқда. Брюссель томонидан 1 август музокаралар учун “охирги муддат” сифатида белгиланаётган бўлса-да, қарши божлар 7 августда кучга кириши мумкин.
Европа томони савдо уруши кучайиши Европа иқтисодий хавфсизлигига таҳдид солишини маълум қилган ва АҚШнинг ҳар қандай бир томонлама иқтисодий чораларига қатъий жавоб қайтарилишини билдирган.
