Колумбия университети Фаластинни қўллаган талабаларни ўқишдан четлатди
Намойиш пайтида 78 киши ҳибсга олинди, 4 талаба шифохонага ётқизилди.
АҚШнинг нуфузли Колумбия университети Фаластинни қўллаб-қувватлаш мақсадида ўтказилган норозилик намойишларида иштирок этган 80 га яқин талабага нисбатан интизомий чора кўрди. Университет раҳбарияти томонидан чиқарилган қарорга кўра, айрим талабаларнинг ўқишдан четлатилиши бир йилдан уч йилгача давом этади. Четлатилганлар университетга қайтиши учун расмий кечирим хати топшириши талаб қилинмоқда.
Санкциялар асосан Бутилер кутубхонасини эгаллаб, Фаластинлик ёзувчи Базеел ал-Аражга бағишланган тадбир ўтказган талабалар гуруҳи аъзоларига нисбатан жорий этилган. Намойишчиларни тарқатиш учун университет раҳбарияти Нью-Йорк полициясини чақирган, натижада 78 киши ҳибсга олинган, тўрт нафар талаба бош мия чайқалиши ташхиси билан касалхонага ётқизилган.
Талабалар ҳаракати вакили ҳисобланган Columbia University Apartheid Divest (CUAD) ташкилоти бу ҳолатни университет тарихида битта сиёсий норозилик ҳаракати учун қўлланилган энг кенг кўламли жазо сифатида баҳолаган. Уларнинг иддаосига кўра, бундай кескин чораларга университет ва АҚШдаги Трамп маъмурияти ўртасида, илгари тўхтатилган 400 миллион долларлик федерал маблағни тиклаш юзасидан олиб борилган музокаралар сабаб бўлган.
Барча босимларга қарамай, талабалар Фаластин масаласидаги фаолликларини давом эттириш ниятида эканликларини маълум қилган.
