Таиланд-Камбоджа можароси кучаймоқда: жанглар курорт ҳудудларга яқинлашди
Баҳсли ибодатхона ҳудуди сабабли бошланган тўқнашувлар ортидан 130 мингдан ортиқ фуқаро хавфсиз жойларга кўчирилди.
Таиланд ва Камбоджа ўртасида бир неча кундан буён давом этаётган қуролли можаролар жанубга силжиб, машҳур курорт ҳудудларга яқинлашмоқда. Бу ҳақда маҳаллий ва халқаро оммавий ахборот воситалари хабар бермоқда.
Дастлаб, тўқнашувлар икки давлат ўртасидаги шимолий чегара чизиғи бўйлаб кузатилган бўлса, ҳозирда янги жанубий фронт очилгани маълум қилинмоқда. Хусусан, жанговар ҳаракатлар Таиланднинг Трат ва Чантхабури провинцияларида олиб борилмоқда. Мазкур ҳудудлар пойтахт Бангкокдан 200 км, машҳур Паттайя курорт шаҳридан эса атиги 150 км масофада жойлашган.
Таиланд расмийлари хабарига кўра, Камбоджа армияси Трат провинцияси ҳудудидан давлат чегарасини бузиб ўтишга уринишган, аммо Таиланд ҳарбийлари уларни орқага чекинишга мажбур қилган. Воқеа ортидан Таиланд Ҳарбий-денгиз кучлари ҳам жанговар ҳолатга келтирилиб, ҳудудга жойлаштирилган.
Можарога сабаб сифатида Преахвихеа ибодатхонаси атрофидаги баҳсли ҳудуд кўрсатилмоқда. Қуролли тўқнашувлар оқибатида ҳозирга қадар 30 га яқин одам ҳалок бўлгани, чегарага яқин ҳудудлардан эса тахминан 130 минг киши хавфсиз ҳудудларга эвакуация қилингани билдирилмоқда.
Хавфсизлик чоралари кучайтирилиб, халқаро ташкилотлар ҳар икки томонни зудлик билан муросага чақирмоқда.
