Туркияда ўғил онасини таёқ билан уриб ўлдирди
Жиноятчининг илгари ҳам гиёҳвандлик бўйича 11 маротаба ҳуқуқбузарлиги аниқланган.
24 июль куни Туркиянинг Адана вилояти Юрегир туманида жойлашган Селаҳаддин Эйюби маҳалласида аянчли воқеа юз берди. Расмий маълумотларга кўра, 27 ёшли Ўғуз Четин исмли шахс онаси Теслиме Четин (63 ёш) билан ўзаро жанжал оқибатида унга тан жароҳати етказган.
Дастлабки суриштирувларга кўра, Ўғуз Четин онасидан пул талаб қилган, бироқ рад жавоби олганидан сўнг, у билан оғзаки тортишувга киришган. Можаро жисмоний тўқнашувга айланиши натижасида у онасини таёқ билан урган. Олинган оғир тан жароҳатлари оқибатида Теслиме Четин воқеа жойида вафот этган.
Воқеадан сўнг гумонланувчи фавқулодда хизматларга қўнғироқ қилиб, “онам ҳушини йўқотди” дея ёлғон маълумот берган. Тез тиббий ёрдам гуруҳи етиб келганида аёлнинг ҳаётини сақлаб қолиб бўлмаганлиги аниқланган.
Аниқланишича, Ўғуз Четин илгари “гиёҳванд моддалардан фойдаланиш” билан боғлиқ 11 та жиноят иши юзасидан рўйхатда турган. Воқеа юзасидан Адана вилояти полицияси ҳузуридаги Қотиллик бўлими томонидан тергов ҳаракатлари олиб борилди. Ўғуз Четин қўлга олиниб, процессуал тартибда судга олиб чиқилди ва чиқарилган суд ҳукмига кўра ҳибсга олинган.
