Туркияда ўрмон ёнғинлари кучаймоқда: икки вилоят табиий офат зонаси деб эълон қилинди
120 та туман аҳолиси эвакуация қилинди, 12 минг қутқарувчи сафарбар этилган.
Туркиянинг Ўртаер денгизи соҳилларида жойлашган ҳудудларда янги ўрмон ёнғинлари юзага келгани ортидан мамлакат ҳукумати Измир ва Билежик вилоятларини табиий офат зонаси деб эълон қилди. Бу ҳақда Туркия Ички ишлар вазири Али Ерликая расмий баёнот берган.
Ёнғинлар Оқсув шаҳри маркази ва унга туташ ҳудудларда кенг миқёсда тарқалган. Аҳоли хавфсизлигини таъминлаш мақсадида кўплаб уйлар бўшатилиб, фуқаролар эвакуация қилинган. Кучли шамол натижасида алангалaр қирғоқбўйи ҳудудларга ҳам тарқалиб, асосий автомобиль йўллари вақтинча ёпилган.
Манавгат шаҳрида ҳам уйлар ва инфратузилма хавф остида қолган. Ёнғинларни бартараф этиш ишларига ўт ўчирувчилар билан бир қаторда, маҳаллий аҳоли, полиция сув пуркагичлари, шаҳар коммунал хизматлари, шунингдек, вертолётлар ва самолётлар жалб этилган. Ёнғинга қарши ҳаракатлар ҳаво ва қуруқликдан мувофиқлаштирилган тарзда олиб борилмоқда.
Вазир Ерликаянинг таъкидлашича, 27 июндан 24 июлга қадар мамлакат бўйлаб 120 та туман ёнғин хавфи сабаб эвакуация қилинган. Бу давр мобайнида 12 мингдан ортиқ қутқарувчи ўрмон ёнғинларига қарши курашган.
Бир ой давом этган ёнғинлар оқибатида 311 та уй бутунлай вайрон бўлган ёки жиддий зарар кўрган. Уйсиз қолган фуқаролар учун ғарбий вилоятларда 85 та вақтинча бошпана ташкил этилган.
Ички ишлар вазирлиги табиий офат зонасида ёнғинлар тўлиқ бартараф этилгунга қадар фавқулодда ҳолатга яқин даражада хавфсизлик чораларини кучайтирганини билдирган.
