Ҳиндистонда ибодатхонада юзага келган тиқилинч оқибатида саккиз киши ҳалок бўлди
Уттаракханд штатида зиёратчилар ибодатхонага кўтарилаётган вақтда электр сими қулаб тушган.
26 июль куни Ҳиндистоннинг Уттаракханд штатида жойлашган Харидвар шаҳрида ибодатхонасига кириш вақтида юзага келган тартибсизлик фожиа билан якун топди. Маҳаллий расмийларга кўра, тепаликда жойлашган ибодатхонага кўтарилаётган минглаб зиёратчилар орасида тор зинапоя бўйлаб ҳаракат пайтида тўпланиш ва ваҳима юзага келган.
Воқеага гувоҳларнинг айтишича, одамларнинг бетартиб ҳаракатланишига электр симининг тушиб кетгани сабаб бўлган. Бу ҳолат омма орасида ваҳимани кучайтириб, юзлаб одамлар бир йўла зинапоядан тушишга уринган. Тиқилинч оқибатида 8 нафар фуқаро ҳалок бўлган, 34 нафар шахс тан жароҳати олган.
Шаҳар соғлиқни сақлаш муассасалари жабрланганларга шошилинч тиббий хизмат кўрсатмоқда. Баъзи фуқароларнинг аҳволи оғир экани маълум қилинган.
Ҳудудга полиция, тез тиббий ёрдам ва қутқарув хизматлари жалб этилган. Маҳаллий полиция тергов ишларини бошлаганини маълум қилди. Расмийлар ибодатхона ҳудудидаги хавфсизлик чораларини қайта кўриб чиқишни режалаштирмоқда.
