Трамп Таиланд ва Камбоджа ўртасидаги можарога аралашди
У икки давлат ўртасидаги кескинлик Ҳиндистон-Покистон зиддиятига ўхшашлигини таъкидлади.
АҚШ президенти Дональд Трамп Жанубий-Шарқий Осиёда кучайган ҳарбий кескинлик бўйича баёнот берди. У Таиланд ва Камбоджа ўртасидаги зиддиятни тинч йўл билан ҳал қилишга тайёрлигини маълум қилди.
Бу ҳақда Трамп ўзининг “Truth Social” ижтимоий тармоғидаги саҳифасида ёзди.
Маълум қилинишича, АҚШ раҳбари Камбоджа бош вазири Хун Сен ва Таиланд бош вазири вазифасини бажарувчи Пхумтам Вечайчай билан телефон орқали мулоқот ўтказган. Улар билан бўлган суҳбатда Трамп АҚШнинг икки давлат билан олиб бораётган савдо музокараларига уруш салбий таъсир кўрсатишини алоҳида таъкидлаган.
"Биз тарифлар бўйича савдо битимлари юзасидан музокаралар олиб бормоқдамиз, аммо уруш давом этса, биз ҳеч қандай шартнома имзоламаймиз. Буни мен уларга тўғридан-тўғри айтдим", — дея баёнот берган Трамп.
Унинг сўзларига кўра, телефон суҳбати якунида ҳар икки томон ҳарбий ҳаракатларни тўхтатишга тайёрлигини билдирган. Трамп, шунингдек, мазкур можаро Ҳиндистон ва Покистон ўртасидаги кескинликни эслатишини ҳам қайд этди.
