Туркияда тарихий иссиқлик: ҳаво ҳарорати илк бор +50 даражадан ошди

25 июль куни Туркия тарихида илк бор ҳаво ҳарорати +50 даражадан юқорига кўтарилди. Мамлакатнинг жануби-шарқий ҳудудида жойлашган Ширнак вилоятининг Силопи туманида расман +50,5°C иссиқлик қайд этилди. Бу — Туркия метеорология хизматлари тарихидаги энг юқори ҳарорат кўрсаткичи сифатида рўйхатга олинди.

 

Туркия Метеорология Бошқармаси маълумотларига кўра, бу ҳолат жорий ёзда мамлакатда ҳукм сураётган узоқ муддатли аномал иссиқ тўлқинлари натижасидир. Мутахассислар фикрича, бу глобал иқлим ўзгаришларининг яққол кўринишларидан биридир.

 

Таъкидлаш жоизки, Ўзбекистонда Ўзгидромет кузатувлари тарихида ҳозиргача мамлакат ҳудудидаги бирорта метеорологик станцияда +50°C ёки ундан юқори ҳарорат расмий равишда қайд этилмаган. Энг юқори кўрсаткичлар одатда +46…+47°C оралиғида бўлган.

 

Аммо иқлим ўзгаришлари жараёнлари давом этса, келгусида бу рекорд кўрсаткичларга яқинлашиш эҳтимоли мавжуд, дейди мутахассислар.

 

Ҳозирда нафақат Туркия, балки Яқин Шарқ, Марказий Осиё ва Шимолий Африка давлатларида ҳам иссиқ тўлқинлар ортидан фавқулодда ҳарорат кўрсаткичлари кузатилмоқда.