Ҳиндистон илк бор коинотга гуманоид робот юборишга тайёрланмоқда
“Вйоммитра” номли одамсимон роботнинг коинотга юборилиши 2025-йил декабрь ойига режалаштирилган.
Ҳиндистон Космик Тадқиқотлар Ташкилоти (ISRO) коинотга илк бор одамсимон роботни юборишга тайёргарлик кўрмоқда. Бу миссия мамлакатнинг илк бошқариладиган космик парвози — “Гаганяан” дастурининг муҳим синов босқичларидан бири бўлади.
ISRO вакили В. Р. Нараянаннинг маълум қилишича, декабрь ойида Вйоммитра номли аёл қиёфасидаги гуманоид робот иштирокида парвоз амалга оширилади. “Вйома” санскрит тилида “коинот”, “Митра” эса “дўст” деган маънони билдиради.
Махсус ишлаб чиқилган ушбу робот коинотга учириладиган капсула ичида автоном тарзда парвоз қилади. Миссиянинг асосий мақсади — космик кеманинг барча муҳим тизимларини, жумладан ҳаёт таъминоти, бошқарув ва хавфсизлик тизимларини реал фазо шароитида синовдан ўтказишдан иборат.
Агар декабрдаги миссия муваффақиятли якунланса, Ҳиндистон 2026-йил давомида яна иккита учувчисиз космик парвозни амалга оширишни режалаштирган. Шундан сўнг, 2027-йил март ойида “Гаганяан” бошқариладиган парвози амалга оширилади. Бу ҳақида бош вазир Нарендра Моди илгари расман эълон қилган.
