Россияда мигрантларга таксичилик қилиш тақиқланди
Янги қарорга кўра, чет элликлар патент асосида такси хизматларида ишлай олмайди.
Россиянинг Санкт-Петербург шаҳри раҳбарияти патент асосида ишлаётган муҳожирларга такси хизматларида фаолият юритишни тақиқлади. Губернатор Александр Беглов томонидан имзоланган ҳужжатга кўра, ушбу чеклов 2025 йил охиригача амал қилади ва 10 кундан кейин кучга киради.
Қарорга мувофиқ, иш берувчиларга ўз ҳайдовчилар таркибини қайта кўриб чиқиш учун уч ойлик ўтиш даври берилади. Бу вақт ичида компаниялар муҳожир ҳайдовчиларни ишдан бўшатиши ва уларнинг ўрнига Россия фуқароларини ишга қабул қилиши керак бўлади.
Расмийларга кўра, мазкур чора такси хизматлари сифатини ва хавфсизлигини ошириш билан бирга, маҳаллий аҳолига қўшимча иш ўринлари яратади. Бироқ июль ойида шаҳар парламенти спикери Александр Бельский бундай қарорлар “коллапс”га олиб келиши мумкинлигини таъкидлаган эди.
Эслатиб ўтамиз, 2025 йил бошида Россиянинг 49 минтақасида, жумладан, аннексия қилинган ҳудудларда муҳожирлар фаолиятига чекловлар киритилган эди. Бу чора-тадбирлар 2024 йил март ойида Crocus City Hall’даги террор ҳужумидан сўнг кучайтирилди. Ўзбекистон ва Тожикистондан келган ишчилар асосий таъсир кўрган гуруҳ бўлиб қолмоқда.
