Террор таҳдиди сабабли Ҳиндистон-Покистон сув келишуви тўхтатилди
“Sindx” операцияси ортидан Деҳли Покистонга сув битими бўйича қатъий шарт қўйди.
Ҳиндистон Ташқи ишлар вазири Субраманиам Жайшанкарнинг парламентда берган баёнотига кўра, мамлакат Покистон Ҳинд дарёси сувларига оид келишувни тиклашини терроризмга барҳам берилиши билан боғламоқда.
Жайшанкар Ҳиндистон парламентининг юқори палатасида “Синдх” ҳарбий операцияси юзасидан бўлиб ўтган муҳокамаларда сўзга чиқиб, Ҳинд дарёси бўйича 1960-йилда имзоланган битим “дўстона ниятлар асосида тузилганини”, аммо бу ҳужжатнинг руҳига йиллар давомида зарар етказилганини таъкидлади.
Унга кўра, Покистон Ҳинд дарёси, шунингдек, унинг ирмоқлари Ченаб ва Желум устидан фойдаланиш ҳуқуқига эга бўлган. Аммо Ҳиндистон 22 апрель куни Жамму ва Кашмирдаги теракт ортидан битимни тўхтатганини билдирган. Расмий Нью-Деҳлининг маълум қилишича, 26 кишининг ҳаётига зомин бўлган ҳужум ортида трансчегаравий терроризм аломатлари аниқланган.
Шундан сўнг, 7 май куни Ҳиндистон армияси “Синдх” номли ҳарбий операцияни бошлади ва Покистон ҳудудидаги нишонларга зарба берди. Покистон бунга жавобан ҳарбий чора кўрди. 10 майда томонлар ўт очишни тўхтатиш борасида келишувга эришган, аммо Ҳиндистон ҳали операция тугамаганини билдирган.
Жайшанкар баёнотида шундай деди: “Ҳинд дарёси бўйича келишув тикланиши учун Покистон терроризмни қўллаб-қувватламаслигини амалда исботлаши керак”.
