Пекинда тошқин оқибатида ҳалок бўлганлар сони 44 нафарга етди
Ҳозирда 80 мингдан ортиқ аҳоли эвакуация қилинган.
Хитой пойтахти Пекинда юз берган кучли ёмғирлар ва сув тошқинлари оқибатида вафот этганлар сони 44 нафарга етгани маълум қилинди. Бу ҳақда мамлакат фавқулодда вазиятлар хизматларига таяниб, "Синхуа" агентлиги хабар берди.
Расмий маълумотларга кўра, ҳалок бўлганлардан ташқари яна тўққиз нафар фуқаро бедарак йўқолган деб ҳисобланмоқда. Аввалроқ 30 киши вафот этгани ва 80 мингдан ортиқ аҳоли хавфсиз ҳудудларга кўчириб ўтказилгани маълум қилинган эди.
23—29 июль кунлари Пекин шаҳри ва унинг атрофидаги бир нечта туманларда — хусусан, Миюн, Хуайроу, Янсин ва Пинггу туманларида — кучли ёғингарчилик қайд этилган. Ушбу табиий офат мазкур ҳудудларга энг катта зарар етказди.
Айни пайтда фавқулодда хизматлар томонидан сув тошқини оқибатларини бартараф этиш ишлари олиб борилмоқда. Табиий офат сабабли юзага келган талафотларни камайтириш мақсадида Хитой ҳукумати томонидан 200 миллион юан (тахминан 28 миллион АҚШ доллари) миқдорида маблағ ажратилди.
