Польшанинг энг йирик авиакомпанияси ёқилғини тежаш учун самолётларга янги ўриндиқлар ўрнатади
14 мингта янги ўриндиқ Recaro томонидан ишлаб чиқилган бўлиб, у самолёт оғирлигини камайтириш ва хизмат харажатларини пасайтириш имконини беради.
Польшанинг энг йирик авиакомпанияси — LOT Polish Airlines ўз самолётларида ёқилғи сарфини камайтириш, хизмат кўрсатиш харажатларини қисқартириш ва йўловчиларга қулайликни ошириш мақсадида янги, енгил ва замонавий ўриндиқлар ўрнатишни бошлайди.
Avia News нашри маълумотига кўра, компания илк маротаба Boeing 737 MAX 8 ва Airbus A220 самолётларига Германиянинг Recaro компанияси томонидан ишлаб чиқилган 14 минг дона юпқа ўриндиқларни жорий этади. Уларнинг биринчи намунаси жорий йил якунига қадар йўловчиларга тақдим этилади.
Янги ўриндиқларнинг афзалликлари қуйидагилардан иборат:
Ҳар бир ўриндиқда 60 Вт қувватли USB Type-C порти мавжуд бўлиб, телефон ва ноутбукни қувватлаш имконини беради;
Ичимлик учун токча ва қопқоқли қурилма ушлагичи бўлган дизайн;
Созланадиган бош суяги ёстиғи — бўйинга қулайлик яратади;
Оғирлиги 10 кг дан кам бўлган ўриндиқлар самолёт оғирлигини камайтиради, бу эса ёқилғи тежамкорлигига хизмат қилади;
Техник хизмат кўрсатиш харажатлари пасаяди.
Нега ўриндиқлар кўк рангда?
Авиация соҳасидаги мутахассислар фикрига кўра, кўк ранг хотиржамлик, ишонч ва осойишталикни уйғотади. Бу йўловчиларнинг стресс даражасини пасайтиради, юрак уриши ва нафас олишни секинлаштиради. Шунингдек, кўк матоларда кир камроқ кўринади, бу эса парвозлар оралиғида тозаликни сақлашда амалий аҳамият касб этади.
