Қозоғистонда ўзбекистонлик фуқаро чегарани бузгани учун ҳибсга олинди

Жорий йилнинг июль ойида Ўзбекистон Республикаси фуқароси Қозоғистон ва Россия ўртасидаги расмий назорат-ўтказиш пунктларидан ташқарида, Павлодар вилоятининг Успенский туманидаги “Жетису” чегара пости ҳудудида ноқонуний ҳаракат қилганликда гумонланиб қўлга олинди. Бу ҳақда inbusiness.kz вилояти суди матбуот хизматига таяниб хабар бермоқда.

 

Расмий маълумотларга кўра, фуқаро чегара чизиғидан 80 метр нарисида ноқонуний тарзда бўлиб, Россияга пиёда ўтмоқчи бўлган. Ҳибсга олинган пайтда у айбига тўлиқ иқрор бўлган, ҳолат эса баённома ва бошқа маъмурий иш материаллари билан тасдиқланган.

 

Павлодар вилояти маъмурий суди фуқаро Т.ни Қозоғистон Республикаси Маъмурий жавобгарлик тўғрисидаги кодексининг 514-моддаси 1-қисми (“Чет элликлар ва фуқаролиги бўлмаган шахсларнинг Қозоғистон Республикасида бўлиш қоидаларини бузиши”) бўйича айбдор деб топди. Суд қарорига кўра, унга 9 суткалик ҳибс жазоси тайинланди.

 

Мазкур ажрим ҳали қонуний кучга кирмаган бўлиб, белгиланган тартибда апелляция берилган бўлиши мумкин.