Россия мактабларида мигрант болаларга пуллик таълим жорий этилиши мумкин
Қонун лойиҳаси бюджет харажатларини камайтириш ва ўқитиш сифатини яхшилашга қаратилган.
Россия Либерал-демократик партияси (ЛДПР) раҳбари Леонид Слуцкий бошчилигидаги бир гуруҳ депутатлар мамлакат Давлат Думасига хорижий фуқаролар ва фуқаролиги бўлмаган шахсларнинг фарзандлари учун 10–11-синфларда бепул таълим олиш имкониятини бекор қилишни назарда тутувчи қонун лойиҳасини тақдим этмоқда. Бу ҳақда “ТАСС” ахборот агентлиги хабар берди.
Тақдим этилган қонун лойиҳасига кўра, “Россия Федерациясида таълим тўғрисида”ги қонунда тегишли ўзгартишлар киритилиши назарда тутилган. Унга мувофиқ, хорижлик ўқувчилар юқори синфларда фақат пуллик асосда ўқишлари мумкин бўлади. Бепул таълим фақат Россиянинг халқаро шартномалари ёки федерал қонунларида белгиланган ҳолларда сақлаб қолинади.
Депутат Слуцкий таъкидлаганидек, Россияда айни пайтда мактаб ўқувчилари учун тахминан 900 мингта ўрин етишмаяпти. Унинг фикрича, айниқса янги қурилган ҳудудларда муҳожир болаларнинг кўплиги мактаблар ва ўқитувчиларга босимни кучайтирган, бу эса таълим сифати пасайишига олиб келмоқда.
Қонун лойиҳаси ташаббускорларига кўра, бу чора таълим инфратузилмаси юкини камайтиради ҳамда Россия бюджети учун қўшимча енгиллик яратади.
