Россиялик эркак 418 марта клиник ўлимни бошдан кечирди
Юрак ритмини кузатувчи қурилма беморнинг ҳаётини юзлаб марта сақлаб қолган.
Россиянинг Перм ўлкасида яшовчи 53 ёшли Ярослав исмли фуқаро 418 марта клиник ўлим ҳолатини бошдан кечирди. Ҳар бир ҳолатда юрагига ўрнатилган кардиовертер-дефибриллятор қурилмаси унинг ҳаётини сақлаб қолди. Бу ҳақда “Комсомольская правда” нашри хабар берди.
Ярославда 2019 йилда юрак тутилишидан сўнг қоринча тахикардияси ривожланган. 2025 йилнинг март ойида унга юрак уриш ритмини кузатиб борувчи ва керак бўлганда электр импульси орқали юракни ишга туширувчи махсус қурилма – кардиовертер-дефибриллятор ўрнатилган.
Мазкур қурилма одатда беш йил давомида хизмат қилади, аммо июль ойида бемор касалхонага ётқизилган ва қурилма тўрт ой ичида энергиясини тўлиқ сарфлаб бўлганлиги аниқланган. Сабаби — дефибриллятор ушбу муддат ичида 418 марта клиник ўлим ҳолатида ишга тушган ва шунингдек, 3 500 марта юрак аритмиясини аниқлаган.
Шифокорларнинг таъкидлашича, бу ҳолатлар ўз вақтида аниқланмаганида ёки қурилма ишламаганида, беморнинг ҳаёти хавф остида қолган бўларди. Ярославга беш соатлик операция ўтказилиб, янги қурилма ўрнатилди. Ҳозирда у соғлом ҳаёт тарзига мослашмоқда.
