Туркияда полициячи хотини ва икки фарзандини отиб ўлдирди
Фожиадан сўнг у ўз жонига ҳам қасд қилган.
Туркиянинг Денизли вилоятида жойлашган Меркезефенди туманида оғир жиноят содир бўлди. Жизре шаҳрида хизмат қилган 35 ёшли полиция ходими Кошкун С. ўзининг йиллик таътилида оиласи ёнига келганида, рафиқаси ва икки фарзандини отиб ўлдириб, сўнг ўз жонига қасд қилди.
Ҳодиса Караман маҳалласдаги тўрт қаватли уйда содир бўлган. Маҳалла аҳолиси тонгда эшитилган ўқ овозларидан сўнг ҳуқуқ-тартибот органларига мурожаат қилган. Воқеа жойига етиб борган терговчиларнинг дастлабки маълумотларига кўра, Кошкун С. ухлаб ётган рафиқаси Назли ҳамда фарзандлари — 7 ёшли ўғли Яғиз ва 2 ёшли қизи Дуруга ўқ узган.
Ҳодиса ортидан тергов ишлари бошланган бўлиб, воқеа сабаблари ҳозирча аниқлаштирилмоқда. Полициячининг руҳий ҳолати ва хизматдаги сўнгги фаолияти юзасидан ҳам алоҳида суриштирув олиб борилмоқда.
