Хитойда 3 ёшли бола 18-қаватдан қулаб, тирик қолди
Дарахт мўжизавий тарзда боланинг ҳаётини сақлаб қолган.
Хитойнинг Ханчжоу шаҳрида 3 ёшли бола кўп қаватли уй дерозасидан 18-қават баландликдан қулаб тушганига қарамай, омон қолди. Бу ҳақда South China Morning Post нашри хабар берди.
Маълумотларга кўра, ҳодиса 15-июль куни юз берган. Ота-онаси болани бир муддатга бувиси ва бобоси қарамоғига қолдириб кетган. Катта ёшли қариндошлар боланинг ухлаётганини ҳисобга олиб, қисқа муддатга дўконга чиққан. Шу вақт ичида бола уйғониб, уйдаги деразага чиқишга уринади ва мувозанатни йўқотиб, пастга қулаб тушади.
Болани дарахт шохлари тутиб қолган бўлиб, бу йиқилиш зарбасини юмшатган. Гувоҳлар томонидан дарҳол тез ёрдам чақирилиб, бола касалхонага етказилган.
Шифокорлар боланинг чап қўли сингани, умуртқаси чўзилгани ва айрим ички аъзолари шикастланганини аниқлаган. Шунга қарамай, унинг бош соҳаси бутун қолган ва бола ҳушида бўлган. Воқеа тиббиёт мутахассислари томонидан “мўъжиза” деб баҳоланмоқда.
