Хитойда қариялар уйини сув босди: 31 киши ҳалок бўлди
Расмийлар хавфсизликда хатоларга йўл қўйилганини тан олди.
Хитой пойтахти Пекин яқинидаги Миюн туманида жойлашган қариялар уйида кучли ёмғирлар ва тошқинлар оқибатида 31 нафар фуқаро ҳалок бўлди. Бу ҳақида маҳаллий ҳукумат вакиллари расмий баёнот берди.
Фожиа жорий ҳафта бошида юз берган бўлиб, ёмғир натижасида тошган дарё сувининг пасттекисликда жойлашган қариялар уйини сув босиши оқибатида юзага келган. Ўша вақтда муассасада 77 нафар киши – ходимлар ва ногирон фуқаролар бўлган. Қутқарувчилар томонидан 48 нафари эвакуация қилинган, бироқ 31 киши ҳалок бўлган.
Расмийларнинг билдиришича, тошқинлар натижасида фақат Пекиннинг ўзида 44 киши ҳаётдан кўз юмган. Ҳудуддаги экстремал об-ҳаво шароити қисқа фурсатда бутун йил давомида ёғадиган миқдордаги ёғингарчиликка тенг бўлган. Фожиадан сўнг расмийлар оммавий тарзда узр сўради ва хавфсизлик режалари етарлича тўлиқ бўлмаганини тан олди.
Қариялар уйидаги ҳодиса айниқса жамоатчилик эътиборини тортган бўлиб, сув сатҳи айрим ҳудудларда икки метргача кўтарилгани қайд этилди. Кўплаб фуқаролар ва уларнинг яқинлари қутқарувчилар ёрдамида тирик қолган бўлса-да, кўплар ҳалок бўлганлар орасида қолмоқда.
