АҚШда эронлик талабалар учун таълим олиш имкониятлари чекланмоқда
Сенатор Томми Тубервилл эронлик ва хитойлик талабалар учун АҚШ университетларига виза берилишини тақиқловчи қонун лойиҳасини таклиф қилди.
АҚШ Сенати аъзоси Томми Тубервилл эронлик ва хитойлик абитуриентларга АҚШдаги олий таълим муассасаларига кириш учун талабалар визасини беришни тақиқловчи қонун лойиҳасини Сенатга тақдим этди.
Бу ҳақда “Free Iran” Телеграм канали хабар берган.
Сенатор Тубервиллнинг таъкидлашича, АҚШни “душман давлатлар” деб ҳисобланадиган мамлакатлардан бўлган талабалар миллий хавфсизликка таҳдид солиши ва америкалик талабаларнинг ўқиш имкониятларини чеклаши мумкин.
Қонун лойиҳасида чет эллик талабалар учун виза квоталарини қайта кўриб чиқиш, қоидабузарликлар учун эса қатъий жиноий чораларни жорий этиш назарда тутилган.
“АҚШга келиб, бизни йўқ қилишга тайёргарлик кўраётган эронликларга йўл очиб бўлмайди”, — деди Тубервилл Fox News телеканалига берган интервьюсида.
Агар мазкур қонун лойиҳаси қабул қилинса, минглаб эронлик талабалар учун АҚШда таълим олиш имкониятлари сезиларли даражада чекланади.
