"ChatGPT" ўз фойдаланувчиларини таътилга юборади
Маълумотларга кўра, янги функция сунъий интеллект билан соғлом ва хавфсиз мулоқот муҳитини яратишга хизмат қилади.
OpenAI компанияси ChatGPT сунъий интеллект тизимига фойдаланувчилар саломатлиги ва соғлом мулоқотни қўллаб-қувватлашга қаратилган янги функция — танаффус эслатмаларини жорий этмоқда.
Бу ҳақда Oxu.Az OpenAI’нинг расмий сайтига таянилиб хабар берди.
Янги функция орқали ChatGPT узоқ суҳбатлар давомида фойдаланувчиларга “қалқиб чиқувчи” ойналар кўринишида юмшоқ эслатмалар беради. Эслатмаларда мулоқотни давом эттириш ёки танаффус қилиш бўйича танлов таклиф этилади. Масалан: “Шунчаки текшириб кўряпман. Анчадан бери суҳбатлашяпсиз — балки дам олиш вақти келгандир?”
OpenAI ушбу тизим фойдаланувчига соғлом ва мувозанатли сунъий интеллект тажрибасини тақдим этиш, у билан мулоқотни янада масъулиятли қилишни мақсад қилганини маълум қилган.
Бунгача бир қатор оммавий ахборот воситалари ChatGPT айрим ҳолатларда фойдаланувчиларга ҳаддан ташқари ижобий жавоб бериши ёки хатоликларга йўл қўйиши мумкинлиги ҳақида хабар берган эди. Жумладан, руҳий тушкунлик ҳолатидаги шахсларга берилган баъзи жавоблар жиддий хавф туғдириши мумкинлиги таъкидланган.
Шу боис OpenAI хавфли саволлар юзасидан чатбот эҳтиёткорлик билан жавоб беришини таъминлашга киришди. Энди у бевосита маслаҳат бериш ўрнига, фойдаланувчининг фикрлашига туртки бўладиган саволлар орқали мулоқотни давом эттиради.
Янги танаффус функцияси эса фойдаланувчиларга суҳбат жараёнида фикрларини қайта кўриб чиқиш, ахборотни танқидий баҳолаш ҳамда ишончлилигини таҳлил қилиш имконини беришни кўзда тутади.
