Францияда Париж ҳудудига тенг майдон ёнмоқда
1500 киши эвакуация қилинди, минглаб хонадон электрсиз қолган.
Франциянинг жанубий қисмида жойлашган Оде департаментида содир бўлган кенг кўламли ўрмон ёнғинлари оқибатида инсон талафотлари ва жиддий зарарлар юзага келди.
Департамент вакили Люси Решнинг BFMTV телеканалига берган баёнотига кўра, табиий офат ҳозирда юқори фаоллик билан давом этмоқда ҳамда ёнғин майдони 11 минг гектарга етган. Таққослаш учун, бу майдон Париж шаҳрининг ҳудудига тенг.
Расмий маълумотларга кўра, ёнғин оқибатида бир аёл ҳалок бўлган — у эвакуацияга рози бўлмаган. Бир шахс бедарак йўқолган, яна тўққиз киши тан жароҳати олган, шулардан бири оғир аҳволда. Жабрланганларнинг етти нафари — ёнғинга қарши курашаётган ўт ўчирувчилардир.
Шунингдек, табиий офат натижасида минглаб хонадонлар электр таъминотисиз қолган, 1500 нафар фуқаро вақтинча бошпаналарга эвакуация қилинган.
