“Нефть нархи яна 10 долларга тушса, Путин одамларни ўлдиришни тўхтатади”
Доналд Трамп иқтисодий босим билан Кремль раҳбарини муросага келтириш мумкинлигини айтди.
Нефть нархининг пасайиши Кремль раҳбари Владимир Путиннинг Украинага қарши урушини тугатишига таъсир қилиши мумкин. Бу ҳақида АҚШ Президенти Доналд Трамп СНБС телеканалига берган интервьюсида айтиб ўтган.
Унинг фикрича, нефть нархининг пасайиши Путинни урушни тугатишга мажбур қилиш учун етарли бўлади.
“Агар бир баррель нефть учун нархни яна 10 долларга туширсак, Путин одамларни ўлдиришни тўхтатади. Унинг танлаш имконияти қолмайди, чунки унинг иқтисодиёти ёмон аҳволда”, - деган Трамп.
Эслатиб ўтамиз, аввалроқ Европа Иттифоқи Россияга қарши 18-санкция пакетини жорий қилганди. Пакетдаги асосий чеклов Россия нефтининг янги максимал нархи эди.
Унга кўра, Россия нефтининг нархи бир баррель учун 60 доллардан тахминан 47,60 долларга туширилган.
