АҚШ Россияга Украинада ўт очишни тўхтатиш эвазига санкцияларни бекор қилишни таклиф қилди
Босиб олинган ҳудудларни тан олиш масаласи 49 ёки 99 йилга кечиктирилиши мумкин.
АҚШ президентининг махсус вакили Стив Уиткофф яқинда Москва шаҳрига ташриф буюриб, Россия Президенти Владимир Путинга Вашингтон таклифларини тақдим этди. Бу ҳақда Польшанинг Onet нашри ўз манбаларига таяниб хабар берди.
Маълумотларга кўра, таклиф лойиҳасида агар Россия Украина бўйича музокараларга рози бўлса, унга бир қатор енгилликлар тақдим этилиши назарда тутилган. Жумладан, АҚШ Россия томонидан босиб олинган Украина ҳудудларини расман тан олиш масаласини 49 ёки 99 йилга кечиктиришга тайёр эканини билдирган. Бу эса мазкур ҳудудлар устидан Москва назоратини маълум муддатга де-факто тан олиш сифатида баҳоланмоқда.
Шунингдек, таклифда АҚШ томонидан Россияга нисбатан уруш муносабати билан жорий этилган санкцияларнинг асосий қисмини бекор қилиш, энергетика соҳасидаги ҳамкорликни тиклаш, жумладан, Россиядан нефть ва газ етказиб беришни қайта йўлга қўйиш каби чоралар ҳам назарда тутилган.
Onet нашри таъкидлашича, мазкур таклифлар фақат Украина ҳудудида ўт очишни тўхтатишга оид бўлиб, барқарор тинчликни кафолатламайди. Шунингдек, Россия учун муҳим бўлган НАТОни кенгайтирмаслик ёки Украинани ҳарбий ёрдамдан маҳрум қилиш каби талаблар АҚШ томонидан илгари сурилмаган.
