Лукашенко президентликка қайта номзодини қўймаслигини эълон қилди
Шунингдек, Беларусь раҳбари ўғлини ворис сифатида кўрсатиш ҳақидаги миш-мишларни рад этди.
Беларусь президенти Александр Лукашенко Time журналига берган интервьюсида ўғли Николай Лукашенкoни ўзининг вориси сифатида кўрсатиш ҳақидаги миш-мишларни рад этди. Давлат раҳбари бу масала бўйича шахсий фикрини билдирар экан, бундай гаплар унинг ўғлини ранжитиши мумкинлигини таъкидлади.
“Йўқ, у менинг ворисим эмас. Сиз буни сўрашингизни билардим. Йўқ, йўқ, йўқ”, — деди Лукашенко.
Шунингдек, у келажакда президентликка ўз номзодини қайта қўйиш режалари йўқлигини маълум қилди. Беларусь раҳбари мамлакатда сиёсий ўзгаришлар бўлиши мумкинлигини инкор этмай, уларни “инқилобий эмас, балки эволюцион йўл билан” амалга оширишга чақирди.
2025 йил 27 январда Александр Лукашенко еттинчи марта Беларусь президенти этиб сайланган эди. У 1994 йилдан буён мамлакатни бошқариб келмоқда. Навбатдаги президентлик сайлови 2030 йилда ўтказилиши режалаштирилган.
Лукашенкoнинг кенжа ўғли Николай ҳозирда Пекин университетида ва Беларусь давлат университетида бир вақтнинг ўзида таҳсил олмоқда. У 2022 йилда мактабни олтин медаль билан тамомлаган бўлиб, 2024 йилда Пекин университети раҳбарияти уни синфидаги энг яхши талаба сифатида таърифлаган.
