АҚШ ва Россия ўртасидаги тарихий учрашув вақти расман белгиланди
Аляскада ўтадиган Путин–Трамп учрашуви “синалувчи босқич” бўлиб, келгусида Путин–Зеленский мулоқотига йўл очиши мумкин.
Россия президенти Владимир Путин ва АҚШ президенти Дональд Трампнинг тарихий учрашуви 15-август куни АҚШнинг Аляска штатида бўлиб ўтади. Россия президенти ёрдамчиси Юрий Ушаков маълум қилишича, музокаралар маҳаллий вақт билан 11:30 да бошланади.
Дастлаб икки давлат раҳбарлари таржимонлар иштирокида юзма-юз суҳбатлашади. Шундан сўнг учрашув делегациялар иштирокида давом этиб, ишчи нонушта билан якунланади. Мулоқотнинг аниқ давомийлиги суҳбат мазмунига қараб белгиланади. Асосий муҳокама мавзуси Россия–Украина можаросини ҳал этиш бўлади.
Россия делегациясида молия вазири Антон Силуанов, мудофаа вазири Андрей Белоусов, ташқи ишлар вазири Сергей Лавров ва Россия тўғридан-тўғри инвестициялар жамғармаси раҳбари Кирилл Дмитриев бор.
Ушаковнинг сўзларига кўра, ушбу учрашув “синалувчи босқич” бўлиб, келгусида Путин ва Украина президенти Владимир Зеленский ўртасида тўғридан-тўғри музокараларга замин яратиши мумкин.
Музокараларда “ҳудудлар алмашинуви” масаласи ҳам кун тартибида туради. Трамп бу жараёнда ҳар икки томон учун “ёқимсиз бўлиши мумкин бўлган шартлар” мавжудлигини, фронт чизиқлари ўзгариши эҳтимолини билдирган. Агар музокаралар муваффақиятсиз якунланса, у жараёндан чиқиб кетишини истисно этмаган.
Россия Ташқи ишлар вазирлиги мамлакат Конституциясида ҳудудий тузилиш қатъий белгиланганини таъкидласа, Зеленский ҳам ҳудудий ўзгаришларсиз ечим тарафдори эканини маълум қилган.
“The Telegraph” нашри эса ўз манбаларига таянадиб, Трамп учрашувда Москва учун бир нечта қулай таклифлар, жумладан, Россияга Аляскадаги табиий ресурслардан фойдаланиш ҳуқуқини бериш ҳамда Россия авиация саноатига қўйилган АҚШ санкцияларни бекор қилиш масаласини кўтариши мумкинлигини хабар қилди.
