Америкада 13 ёшли бола 70 метрлик қоядан йиқилиб, омон қолди
У жарликда 4 кун озиқ-овқатсиз ва сувсиз қолиб кетган.
АҚШнинг Миссури штатида жарликдан қулаб тушган 13 ёшли бола мўъжизавий тарзда омон қолди, дея хабар бермоқда “Газета.ру” нашри.
Коди исмли бола 27 июль куни Гуз-Крик кўли яқинида яшовчи дўстининг уйига бориш учун скейтбордда кетаётганда ғойиб бўлган. У уйга қайтмагач, оила полицияга қўнғироқ қилган. Кўнгиллилар, қариндошлар ва шериф ходимлари иштирок этган қидирув ишлари 80 соатдан ортиқ давом этди.
Уч кундан кейин Кодининг акаси скейтбордни топиб олди ва Дарил исмли хизмат ити қутқарувчиларни тик қояга етаклади. Пастки қисмида, жазирама қуёш остида, мактаб ўқувчиси тирик, аммо жиддий жароҳатлар билан топилган.
Ўсмир вертолётда Сент-Луис болалар касалхонасига етказилган, у ерда сунъий нафас олдириш аппаратига уланган ва реанимация бўлимида сақланмоқда.
Шифокорларнинг айтишича, тикланиш жараёни узоқ бўлади. Коди оғир аҳволда реанимацияда қолмоқда ва жароҳатлар билан курашишда давом этмоқда. Ҳолати стабиллашганидан кейин у реабилитация марказига ўтказилади.
