Россияда ўзбекистонлик эркак терроризмни молиялаштиргани учун 9 йилга қамалди
Судланувчи 350 минг рубль жарима тўлаш ва қаттиқ тартибли колонияда жазо ўташга ҳукм қилинди.
Россия Федерациясида Ўзбекистон Республикаси фуқаросига нисбатан терроризмни молиялаштириш айби бўйича суд ҳукми чиқарилди. Новосибирск иккинчи Шарқий округ ҳарбий суди қарорига кўра, 28 ёшли шахс 9 йил муддатга озодликдан маҳрум қилинди ҳамда 350 минг рубль миқдорида жарима тўлашга мажбур этилди.
Суд қарорига мувофиқ, жазонинг дастлабки уч йили қамоқхонада, қолган қисми эса қаттиқ тартибли колонияда ўталади. Маҳкама, шунингдек, айбдорни Россия ҳудудидаги террористлар ва экстремистлар рўйхатига киритиш ҳақида қарор қабул қилди.
Тергов маълумотларига кўра, судланувчи Россияда тақиқланган ва террорист сифатида тан олинган халқаро ташкилот фаолиятини молиявий жиҳатдан қўллаб-қувватлаш мақсадида ўз танишининг банк ҳисоб рақамига маблағ ўтказган. Ушбу маблағ кейинчалик мазкур ташкилот аъзосига етказилган.
