АҚШда фалаж беморларнинг ички нутқини ўқийдиган мия чипи яратилди
Синовларда 4 нафар фалаж бемор иштирок этди, аниқлик 74 фоизга етди.
АҚШнинг Стэнфорд университети олимлари фалажланган беморларда ички нутқни аниқлаш ва қайта тиклаш имконини берувчи илк мия чипини синовдан ўтказди. Бу ҳақда Financial Times нашри маълум қилди.
Аввалги тадқиқотларда инсон гапиришга уриниш пайтида миянинг мотор кортекси фаолияти ўрганилган бўлса, янги технология фикрлаш жараёнида юзага келадиган сигналларни ҳам қайд этишга муваффақ бўлди.
“Биз илк бор инсон гапиришни хоҳлашидан аввал мияда қандай жараёнлар кечишини тушуна олдик”, — дея таъкидлади профессор Эрин Кунтс.
Лойиҳа доирасида фақат кўз ҳаракатлари орқали мулоқот қила оладиган тўртта шол беморда тажрибалар ўтказилди. Уларнинг мотор кортексига махсус электродлар жойлаштирилди. Сунъий интеллект ёрдамида нерв импулсларининг фонемаларга мос нақшлари аниқланиб, сўз ва гаплар шакллантирилди.
Декодлаш аниқлиги реал вақт режимида 74 фоизга етгани қайд этилди. Стэнфорд олими Френк Уилеттнинг фикрича, келажакда бу каби тизимлар фақат фикр кучи орқали тўлиқ нутқни қайта тиклаш имконини бериши мумкин.
Мутаҳассислар, шунингдек, фойдаланувчиларнинг фикрлари махфийлигини таъминлаш мақсадида махсус пароль тизимини ҳам ишлаб чиқишган.
