Трамп Украинани сулҳга мажбур қилиш учун Путин билан тил бириктирди — Украина
Украина расмийларининг фикрича, АҚШ президенти ўт очишни тўхтатиш ўрнига Россия талабларига йўл очмоқда.
Украина расмийлари ва жамоатчилик вакиллари АҚШ президенти Дональд Трампнинг Анкоридждаги музокаралардан кейин билдирган позициясини кескин танқид қилди. Financial Times нашри хабарига кўра, Трамп Россия президенти Владимир Путиннинг сулҳга рози бўлмаслигидан сўнг уни жазолаш бўйича олдиндан айтилган қатъий чораларни амалга оширмади. Аксинча, у дарҳол ўт очишни тўхтатиш тарафдори эмаслигини ва Россия ҳамда Украина ўртасида якуний тинчлик келишуви тузилишини хоҳлашини билдирди.
Путин эса бундай келишув учун Донбасс ҳудудининг тўлиқ топширилиши, Қримнинг Россия таркибида тан олиниши ҳамда Украинага НАТОга қўшилиш тақиқи қўйилишини талаб қилган.
Украина ҳукумати вакиллари буни “хиёнат ва орқадан урилган зарба” сифатида баҳолади. Юқори лавозимли амалдорлардан бири Трампнинг “тезкор битим” излаётганини айтди. Олий Рада ташқи ишлар қўмитаси раиси Александр Мережко эса Трамп ва Путин бирлашиб, Украинани “мажбурий тинчлик”ка кўндириш йўлидан бормоқда, бу эса мамлакат учун амалда таслим бўлиш билан баробар эканини таъкидлади. У Анкоридж учрашувининг натижаларини “фожиали ва хавфли” деб баҳолади.
