Грецияда 273 йўловчи бўлган самолёт двигатели ёниб кетди
Самолёт 450 метр баландликка кўтарилганда ўнг двигателда носозлик юзага келган.
Грециянинг Корфу аэропортидан парвоз қилган Condor Airways’нинг Boeing 757-300 самолётида фавқулодда ҳолат юз берди. Самолётда 273 йўловчи ва 8 нафар экипаж аъзоси бўлган. Парвоз бошлангандан бир нечта дақиқа ўтиб самолётнинг ўнг двигатели ёниб кетган. Бу ҳақда “Philenews” хабар берди.
Гувоҳларнинг айтишича, самолёт ҳавога кўтарилганидан сўнг портлашга ўхшаш овоз эшитилган, орадан кўп ўтмай двигатель ёнган. Хабарларга кўра, самолёт баландлиги 450 метрга етганида носозлик юзага келган. Учувчилар двигательни ўчиришга ҳаракат қилган, бироқ бунга муваффақ бўлмаган.
Корфу аэропортида фавқулодда ҳолат сигнали эълон қилинган бўлса-да, учувчилар бир двигатель ёрдамида парвозни давом эттиришга қарор қилган. Шундан сўнг самолёт 8 минг фут баландликка кўтарилиб, хавфсиз тарзда Италиядаги Бриндизи аэропортига қўнган.
Condor Airways расмий баёнотида: “Йўловчилар хавфсизлиги биз учун биринчи ўринда. Ҳар қандай ноқулайлик учун узр сўраймиз”, дея маълум қилган. Ҳодиса оқибатида ҳеч ким жабрланмагани билдирилган.
