Путин ва Зеленский учрашуви учун нейтрал майдон сифатида Швейцария кўрилмоқда

Швейцария ҳукумати Россия президенти Владимир Путинга мамлакатга келиб, Украина етакчиси Владимир Зеленский билан музокара олиб бориши учун кафолат беришга тайёр эканини маълум қилди. Бу эса амалдаги ҳибсга олиш ордери ижро этилмаслигини англатади, деб ёзади Bild нашри.

 

Швейцария ташқи ишлар вазири Игнацио Кассиснинг таъкидлашича, Федераль кенгаш бундай ҳолатлар учун қоидаларни ўтган йили тасдиқлаган. Шу боис эҳтимолий учрашув жойи сифатида Швейцария кўриб чиқилиши мумкин.

 

Аввалроқ Зеленский бир неча бор Путиндан юзма-юз учрашувни талаб қилган эди. Унга кўра, урушни тўхтатиш бўйича якуний қарор фақат Россия раҳбарига боғлиқ. Шу пайтгача Кремль бунга рози бўлмаган, бироқ вазият ўзгариши эҳтимоли пайдо бўлмоқда.

 

Вашингтонда Зеленский, АҚШ президенти Дональд Трамп ва Европа етакчилари иштирокида бўлиб ўтган саммитдан сўнг, Путин ҳам Зеленский билан бевосита музокара қилишга тайёрлигини билдирган. Трамп ижтимоий тармоқларда у аллақачон Путин билан телефон орқали гаплашганини ва икки томонлама учрашув тайёрлаётганини ёзди. Кремль ҳам Россия раҳбари "очиқ" эканини тасдиқлади.

 

Саммит иштирокчилари музокара Европада ўтиши кераклиги борасида якдил фикр билдирган бўлсалар-да, Путиннинг Европага ташрифи унга нисбатан ҳибсга олиш хавфи билан боғлиқ.

 

Маълумот учун, 2023 йил 17 мартда Халқаро жиноий суд Владимир Путин устидан ҳибсга олиш ордери чиқарган эди. Унга Украинадаги босиб олинган ҳудудлардан болаларни ноқонуний равишда Россияга олиб ўтишда айблов қўйилган. Бу ҳаракат ҳарбий жиноят сифатида баҳоланмоқда ва судда айбдор деб топилса, умрбод қамоқ жазоси қўлланиши мумкин.

 

Путин аввалроқ АҚШ президенти Дональд Трамп билан учрашув учун Аляскага ҳеч қандай муаммосиз ташриф буюрган, чунки АҚШ Халқаро жиноий суд юрисдикциясини тан олмайди.