Қозоғистонда судья журналистларга тилини чиқарди
Қозоғистон суд тизими воқеага муносабат билдириб, суд обрўсига зарар етказувчи ҳаракатлар қатъий назоратга олинишини таъкидлади.
Жорий йилнинг 18 август куни Қозоғистоннинг Чимкент шаҳар судида бўлиб ўтган суд мажлиси чоғида кутилмаган воқеа юз берди. Шаҳар ҳокими ўринбосари Руслан Берденовга уюштирилган ҳужум иши бўйича суд жараёнида раислик қилаётган судья Абинур Қорабоев матбуот вакилларига тилини чиқаргани акс этган видео тарқалди дея хабар бермоқда media.az нашри.
Мазкур ҳолатни журналистлардан бири тасвирга олиб, ўзининг Facebook саҳифасига жойлаштирган. Видеода судья ҳазил тариқасида тилини чиқаргани кўринган бўлса-да, воқеа кенг жамоатчиликнинг кескин муносабатига сабаб бўлди.
Қозоғистон суд ҳокимияти раҳбарияти ҳолат юзасидан ички текширув бошланганини маълум қилди. Расмий изоҳда суд тизими обрўсига путур етказувчи хатти-ҳаракатларга нисбатан қатъий чоралар кўрилиши қайд этилган.
Эслатиб ўтамиз, ушбу жиноят иши вилоятда энг кўп муҳокама қилинаётган мавзулардан бири бўлиб, жабрланувчининг юқори мавқеи ва жамоатчиликнинг қизиқиши жараённи янада эътиборга молик қилган.
