Шимолий Корея Сеулни провокацияда айбламоқда
Жанубий Корея ҳарбийлари КХДР билан чегарада огоҳлантирувчи ўқ очган.
Шимолий Корея Жанубий Корея ҳарбийларини чегарада провокацион ҳаракатларда айблади. Бу ҳақда Корея Халқ Армияси Бош штаби ўринбосари, генерал-лейтенант Ко Жонг Чхол маълум қилди. Унинг сўзларига кўра, Жанубий Корея ҳарбийлари чегарада тўсиқ ўрнатаётган КХДР аскарларига қарата катта калибрли пулемётдан 10 дан ортиқ ўқ узган.
Пхеньяннинг билдиришича, бу воқеа АҚШ ва Жанубий Корея ўтказаётган Ulchi Freedom Shield қўшма ҳарбий машғулотлари фонида юз берган. “Бундай ҳаракатлар хавотирли аломат бўлиб, вазиятни янада кескинлаштириши мумкин. Армиямиз чегарадаги ҳолатни диққат билан кузатиб бормоқда”, деди генерал-лейтенант Ко Жонг Чхол.
Жанубий Корея Бирлашган штаб бошлиқлари эса баёнотида, ўқ узиш ҳолати Шимолий Корея аскарлари ноаниқ қурилиш ишлари олиб бораётган пайтда ҳарбий демаркация чизиғини қисқа муддатга кесиб ўтганидан сўнг юз берганини тасдиқлади. Уларнинг қайд этишича, Шимолий Корея аскарлари ҳудудига ортга қайтган, қарши томондан эса жавоб ўқи бўлмаган.
Сўнгги ойлар давомида Жанубий Корея чегарада бир неча бор огоҳлантирувчи ўқлар ва карнай орқали хабар бериш усулларидан фойдаланган. Мутахассисларнинг фикрича, Шимолий Корея чегарани мустаҳкамлаш, миналар қўйиш ва бошқа ишлар олиб бораётгани сабабли бу каби вазиятлар тобора тез-тез кузатилмоқда.
