Хитойда шифокорлар қизчанинг бошидан 15 см узунликдаги пичоқни олиб ташлашди
Ҳозирда қизчанинг аҳволи барқарор экани айтилмоқда.
Хитойнинг жанубий ҳудудида шифокорлар кичкина қизчанинг бошига тасодифан тиқилиб қолган 15 сантиметр узунликдаги ошхона пичоғини муваффақиятли олиб ташлашди.
South China Morning Post хабарига кўра, ҳодиса 15 август куни юз берган. Интернетда тарқалган видеода она уч ёшли қизи билан касалхонага югуриб бораётгани акс этган.
Онанинг сўзларига кўра, у чойшабни алмаштираётган пайтда яқин атрофда ётган пичоқ тасодифан учиб кетиб, қизчанинг бошига тиқилиб қолган.
Бироқ кейинчалик касалхона ходимларидан бири онанинг пичоқни аслида қизини қўрқитиш учун қўлга олгани, бироқ тасодифан уни бошига санчиб олганини айтиб берган.
Шифокорлар пичоқни тезкор операция орқали олиб ташлашган. Қизча ҳозирда касалхонада даволанмоқда ва унинг аҳволи барқарор экани айтилмоқда.
Полиция ҳодисани расмий равишда бахтсиз ҳодиса деб баҳолаб, жиноят аломатларини топмаган. Мутахассисларнинг айтишича, болаларнинг калла суяги нисбатан юмшоқ бўлгани учун пичоқ ҳаёт учун хавфли даражада чуқур кирмаган.
