Трамп: Ғазо можароси икки-уч ҳафта ичида ҳал қилиниши мумкин
АҚШ президенти можарони бартараф этишда ижобий хулоса яқин орада бўлишига ишонишини қайд этди.
АҚШ Президенти Доналд Трамп Ғазо секторида давом этаётган можаро қисқа муддатда ҳал этилиши мумкинлигини билдирди. Бу ҳақда у Оқ уйда Жанубий Корея Республикаси янги сайланган Президенти Ли Чже Мён билан учрашуви олдидан журналистлар саволларига жавоб берар экан айтиб ўтди.
Трампнинг сўзларига кўра, Яқин Шарқда юзага келган вазият минг йиллар давомида давом этиб келаётган тарихий зиддиятларга бориб тақалади. Шу билан бирга, АҚШ президенти келгуси икки-уч ҳафта ичида муаммони бартараф этиш йўлида ижобий натижага эришиш мумкинлигини таъкидлади.
“Ўйлайманки, яқин икки-уч ҳафта ичида биз можаро бўйича яхши хулосага келамиз. Бу ҳақда гапириш мушкул, чунки бу ҳудуд асрлар давомида кескинлик ўчоғи бўлиб келган”, — деди Трамп.
Унинг қайд этишича, АҚШ Яқин Шарқдаги тинчлик жараёнида фаол иштирок этишда давом этади ва минтақада барқарорликни таъминлашни устувор мақсад сифатида кўради. Трамп шунингдек, янги сайланган Жанубий Корея президенти билан ўтказилган музокараларда ҳам хавфсизлик, иқтисодий ҳамкорлик ва глобал муаммоларни муҳокама қилганини қайд этди.
