Россияда ўзбекистонлик эркак конда ҳалок бўлди
У тошлар босиб қолиши оқибатида вафот этган.
2025 йил 26 август куни “Артёмовский рудник” АЖ шахтасида меҳнат патенти асосида ишлаётган 30 ёшли Ўзбекистон фуқароси ҳалок бўлди. У тоғ жинсларини қазиш ва мустаҳкамлаш ишларини бажараётган вақтда кучли кўчки содир бўлиб, ишчи қазилма остида қолган ва олган жароҳатлари сабаб воқеа жойида вафот этган.
Ҳодиса рўй берган пайтда шахтада 48 нафар ишчи бўлиб, ишлар одатий тартибда давом этган. Фожиа содир бўлган участкада хавфсизлик постлари ўрнатилгани маълум қилинган.
Прокуратура иш берувчи томонидан меҳнат муҳофазаси ва саноат хавфсизлиги қонунларига қай даражада амал қилинганини текширмоқда. Текширувга ҳудудий меҳнат инспекцияси мутахассислари ҳам жалб этилган.
Ҳозирда жиноят иши қўзғатиш масаласи кўриб чиқилмоқда.
