Россияда илк бор чикунгунья вируси қайд этилди
Касалликнинг мамлакат ичида тарқалишига қарши назорат кучайтирилди.
Россияда чикунгунья иситмаси билан касалланишнинг биринчи ҳолати қайд этилди. Роспотребнадзор матбуот хизмати хабарига кўра, бемор Шри-Ланкадан Москвага учиб келган ва кейинги куни соғлиғи ёмонлашгани сабабли шифокорларга мурожаат қилган.
Тиббий муассасага ётқизилган беморда дастлаб бошқа вирусли иситма гумон қилинган, аммо лаборатория текширувлари натижасида чикунгунья вируси аниқланган. Ҳозирда бемор ўртача оғир аҳволда юқумли касалликлар бўлимида даволанмоқда.
Мутаҳассисларнинг қайд этишича, Роспотребнадзор ушбу хавф ҳақида аввалдан огоҳлантирган ва зарурий чоралар кўришга тайёр бўлган. Касалликнинг мамлакат ичида тарқалишига йўл қўймаслик бўйича назорат кучайтирилган.
