Россияда ўзбекистонлик эркак ноқонуний миграция ташкил этгани учун қамалди
У Россияда мигрантларга сохта ҳужжат тайёрлаб берган.
Камчаткада Ўзбекистон фуқаросига нисбатан ноқонуний миграцияни ташкил этиш иши бўйича суд ҳукми чиқарилди. Тергов маълумотларига кўра, у икки йил давомида ватандошларига қалбаки ҳужжатлар тайёрлаб, Россия ҳудудида белгиланган муддатдан ортиқ қолишларига ёрдам берган.
Айбланувчи Москвадаги почта бўлимларида ватандошларининг паспортларини йиғиб олиб, уларга сохта чегара штамплари босган, миграция карталари ясаган ва уларни шериги орқали Петропавловск-Камчатский шаҳрига етказган. Жараён 2022 йил июлидан 2024 йил июнигача давом этган.
ФСБ ходимлари томонидан Москвада қўлга олинган эркак кейинчалик Камчаткага олиб келинган. Унинг шериги бир йилга озодликдан маҳрум этилиб, Россиядан чиқариб юборилган.
Суд мажлисида гумонланувчи ўз айбини тан олиб, қилган ишидан пушаймон эканини билдирган. Натижада Петропавловск-Камчатский шаҳар суди уни бир йил икки ой муддатга умумий тартибли колонияга қамаш тўғрисида қарор чиқарди. Ҳукм ҳозирча қонуний кучга кирмаган.
