Трамп: Икки томонлама учрашув бўладими, билмайман, лекин уч томонлама учрашув бўлиб ўтади
АҚШ президенти Россия-Украина урушига барҳам бериш ўзининг сайловолди ваъдаларидан бири эканини эслатди.
АҚШ президенти Доналд Трамп Россия ва Украина ўртасида тинчлик ўрнатиш бўйича уч томонлама учрашув ўтказилиши борасида ишонч билдирди. Унга кўра, АҚШ, Россия ва Украина иштирокида музокаралар ўтказилиши режалаштирилмоқда.
Трамп шу билан бирга Россия президенти Владимир Путин ва Украина раҳбари Владимир Зеленский ўртасида икки томонлама учрашув бўлиши масаласи ҳозирча номаълумлигини таъкидлади.
“Уч томонлама учрашув бўлади. Икки томонлама бўладими — билмайман, лекин уч томонлама учрашув бўлади. Ба’зида одамлар бунга тайёр бўлмайди”, — деди АҚШ президенти.
Трамп вазиятни ўхшатиш орқали изоҳлаб, томонларнинг тўқнашувлари узоқ давом этиши мумкинлигини, бироқ вақт ўтиши билан музокара орқали тўхташга мажбур бўлишларини қайд этди.
Маълумки, Россия-Украина урушига барҳам бериш Доналд Трампнинг сайловолди ваъдаларидан биридир. Шу мақсадда АҚШ маъмурияти феврал ойидан буён Москва ва Киев билан алоҳида музокаралар олиб бормоқда, аммо ҳозирча сезиларли натижага эришилгани йўқ.
