Британия Россияга қарши санкцияларни кенгайтирди: рўйхатга Рамзан Қодировнинг онаси ҳам киритилди
Лондонда янги санкциялар Россияда болаларни мажбурий депортация қилиш ва ҳарбийлаштириш билан боғлиқ шахслар ва ташкилотларга қарши жорий этилди.
Буюк Британия Россияга қарши санкциялар рўйхатини яна 11 та янги банд билан кенгайтирди.
Британия ҳукумати баёнотига кўра, санкциялар Украина болаларини мажбурий депортация қилиш, уларни мафкуравий таъсирга олиш, ҳарбийлаштириш ва уларнинг маданий меросини йўқ қилишда иштирок этган шахслар ҳамда ташкилотларга нисбатан қўлланилган.
Янги рўйхатда саккиз нафар жисмоний ва учта юридик шахс бор. Улардан бири — Чеченистон раҳбари Рамзан Қодировнинг онаси ва “Ахмат Қодиров жамғармаси” президенти Аймани Қодирова. Шунингдек, “Ўсмирлар дастурлари маркази” раҳбари Валерий Майоров ҳамда Россия Таълим вазирлиги ҳузуридаги Давлат сиёсати департаменти директор ўринбосари Анастасия Аккуратова ҳам санкциялар остига тушди.
Рўйхатга, шунингдек, “Ғалаба кўнгиллилари” ва “Биринчи ҳаракат” каби давлатга қарашли ёшлар ташкилотлари, Татаристон бош вазири ўринбосари Лейла Фазлеева, Чеченистон ИИВ махсус полки қўмондони Замид Чалоев, Татаристон ёшлар ишлари вазири Ринат Содиқов ҳамда бошқа бир нечта амалдорлар — жумладан, Наталия Тишченко ва Александровлар ҳам киритилган.
